Congress chauhin sorkar nghet a pe thei - Manipur ex-CM Ibobi Singh

Manipur chief minister, Congress hruaitu O Ibobi Singh chuan Manipur-ah Congress sorkarin sorkar nghet a pe thei a, an sorkar hunah remna a awm thei dawn niin Thawhṭanni khan a sawi.

Imphal West district-a Konthoujam-a mipui pungkhawm hmaa thu a sawinaah, Singh chuan member 60 awmna assembly-ah MLA 50 chuang nei mah se, BJP leh a kaihhruai sorkar chuan state chhungah remna leh muanna a siam thei lo a ni, a ti. "India leh Manipur-ah hian Congress chauhin sorkar ngelnghet tak a siam thei a, Congress tihchak nan mi zawng zawngin ṭan kan lak a ngai a ni, a ti. Congress in sorkarna a siam hunah chauh Manipur-ah remna a awm tur thu a sawi bawk.

CM hlui chuan Manipur-ah BJP chuan a thawhpui party-te nen MLA 50 chuang neiin majority chiang tak nei mah se, remna leh muanna awm theih nan state an enkawl thei lo tiin a sawi bawk. State chhunga buaina thleng mek chu thlir liam mai maiah a puh a ni.

Congress legislature party hruaitu, Singh chuan prime minister Narendra Modi chuan Manipur-a hnam pahnih inkara buaina chhuak chungchangah thu engmah sawi a la nei lo a, hetih lai hian ṭhenawm state-te erawh a tlawh thu a tarlang.

Manipur-ah hian N Biren Singh chu chief minister a nihna aṭangin bang mah se, BJP hian majority an nei a, sorkar an la siam thei tho a ni. Mahse sorkar thar siamtir loa President's Rule puan a ni chu Constitution-in dikna a pekte chhuhsakna tiin Singh chuan a sawi bawk. India chu khawvel hmun hrang hrangah democratic system hmanga hriat hlawh ni mah se, state chhunga thil thleng nen a inkalh tlat a ni, tiin a sawi.