Meghalaya : Lirthei lutte tech-scanner hmangin enfiah dawn

Meghalaya sorkar chuan an state-a ruihhlo tawlhluh tih tawpa nih theihna atan lirthei lutte chu high-tech scanner hmangin a enfiah zel dawn. Hemi atan hian sorkar chuan advanced scanner vehicle lei a remti a, entry point chu ruihhlo hmuhchhuah theihna tur technology thar ber ber hmanga thuam a ni ang.

Social welfare minister Paul Lyngdoh chuan Ningani khan hetiang lirthei pakhat chu hman mek a nih thu a sawi a, pakhat dang chu Ratacherra bulah dah a nih tur thu a puang.

State sorkar chuan he scanner technology thar ber zinga mi a hman chuan, ruihhlo leh a kaihhnawih te chu Meghalaya state chhunga an luh apiangin an hmuchhuak nghal thei dawn tih a sawi.

Minister chuan he hmalakna hmang tur hian phalna pek a nih thu a sawi a, lirthei dahna tur chungchangah hmun dik tak an la siam fel lo a, lirthei tlan dan nghawng lo turin a hmun a zau leh zau loh an enfiah a ngai dawn a ni, a ti.

Ruihhlo lut tur venna atan hian K9 sniffer ui 10 leh trainer te nen bul an ṭan dawn a, he rawtna pawh hi pawm a ni tawh. Directorate of Social Welfare hnuaia The Drug Reduction, Action Mission (DREAM) chuan State Convention Centre-ah meeting koin, sakhaw hrang hrang hruaitute chu ruihhlo hmansual dona kawngah thawpui turin a sawm. Mission director F.G. Kharshiing chuan Minister Lyngdoh chu sawi honaah hian a sawm a, sakhaw behchhan zirna inte'n inzirtirna uar leh khawtlang hruaitute hmalakna tih hmasawn kawnga chanvo pawimawh tak an neih thu a sawi.