Assam: USTM buaina karah CM-in zirna lama inbumna tih bo tiam

Assam chief minister Himanta Biswa Sarma chuan Assam-a zirna lama thil dik lo thianfai turin thutlukna siam a hmalak a tiam a, zirna lam dik taka kalpui chu sorkarin a ngaih pawimawh ber a ni, a ti. Tun hnaia harsatna an tawh te sawiin, CM Sarma chuan state chhunga zirna dinhmun tichhe thei thil dik lo leh ṭha lo tak takte a tarlang bawk.

Chief Minister chuan zirlai ṭhenkhat chu medical, engineering, leh CBSE exam hmain exam centre bik-ah sawn an nih thu a sawi a, hei hian thil dik lo a siamsak a ni, a ti. Hetianga exam hmunte tih danglamna hi inbumna lian tak a ni a, merit-based system tichhe thei a ni, tiin CM Sarma chuan a sawi. Ph.D degree zir mek te pawhin academic leave la loin hna an thawk nia sawiin, doctoral research-a thil phut khauh tak takte a awm laia full-time-a hna an thawh pah theih reng dan chu a hriatthiam loh thu sawiin, hei hian academic research a tih hlut loh thu a sawi a ni.

CM Sarma chuan a kaihhruai sorkar zirna chu sumdawnna hmun ni loin sector ropui tak a nih chhunzawm zel theihna atan theihtawp a chhuah tih a sawi. Zirna chu sumdawnna atana hman a nih lohna tur leh, zirna hmun thianghlimna vawng nung turin hmalakna khauh taka kalpui a nih tur thu a sawi bawk a ni.

Heng thil hi tun hnaia Sribhumi-ah CBSE exam-a thil dik lo ti nia sawi, USTM Chancellor Mahbubul Hoque-a man a nih vang a ni. Zirtawpni zan khan Assam Police leh STF-te'n Ghoramara-a a chenna in aṭangin an man a, chhui chian a ni ang.