Assam: Congress MP Rakibul-a'n beih a tawk

Assam-a Congress MP Rakibul Hussain leh a personal security officer (PSO)-te chuNagaon district-ah Ningani, February 20, 2025 khan mipui pungkhawmin an bei. He thil thleng vang hian chief minister Himanta Biswa Sarma chuan eptu hruaitu hi district-a a awm chhungin venhimna tih chak a nih tur thu a puang.

Lok Sabha-a Assam Dhubri bial aiawhtu, Hussain hian hliam tuar lo mah se a PSO pahnihte'n hliam tenau an tuar niin police officer pakhat chuan a sawi. State Congress chuan he pawikhawinaa inhnamhnawih te chu man nghal an phut.

Hussain hi Rupohi police station hnuaia Gunomari khuaah party meeting-a tel tura a kal chu kawng lakah puanduma hmai khuhte chuan cricket bat hmangin an bei niin police-te chuan an sawi. PSO-te chuan silai hmetpuakin MP venhim tumin an bei a, mahse anni pawhin beih an tawk ve zui a ni.

Police-te chuan pawikhawihna thlenna hmun an thlen hian mipui an hnawtdarh a, Hussain hi damdawi inah hruai niin, first aid pek a ni. A hnuah MP hian a thusawina hmun tur chu Police Superintendent kaihhruaia venhimna hnuaiah a pan leh a ni. He thil thleng hi police-te chuan an chhui zui mek bawk.

Assam Pradesh Congress Committee (APCC) president Bhupen Borah chuan MP Hussain-a beih a ni chu a dem thu sawiin, Chief Minister chu state chhunga dan leh thupek vawn ṭhat kawnga a hlawhchhamna niin a sawi. Police-te'n pawikhawihtute chunga hma an lak loh chuan police te chu BJP te hmanrua mai an nih tur thu a sawi bawk. Congress hruaitu leh hnathawkte chungah hetiang thil hi vawi eng emaw zat a lo thleng tawh a, mahse tun thlengin pawikhawihtute lakah hian hmalak a la ni lo niin a sawi a ni.