Meghalaya: Meghalaya autonomous district council 2-ah inthlang

Meghalaya-a Khasi leh Jaintia Hills Autonomous District Council inthlan chu nimin khan venhimna ṭha tak hnuaiah neih a ni.

Khasi Hills Autonomous District Council (KHADC)-a bial 29 leh Jaintia Hills Autonomous District Council (JHADC)-a bial 29-ah zing dar 7 aṭangin vote thlak ṭan a ni.

KHADC-ah hian candidate 158 awmin JHADC-ah candidate 114 an awm a, vote nei hi mi nuai 13 chuang an awm. KHADC-ah hian polling station 1,798 awmin, JHADC-ah hian polling station 483 a awm a, heng zingah hian KHADC huam chhunga polling station 129 leh JHADC-ah 95 chu venhimna ngai zualah puan an ni. Tribal council inthlanna zalen, felfai leh tluang taka kalpui a nih theih nan security force-te dah an nih thu official-te chuan an sawi.

Vote tla hi kar leh Thawhṭannia chhiarin inthlan result hi puan a ni ang. Council pahnih term hi March 5-ah a tawp dawn a ni.