Arunachal Pradesh: Statehood Day vawi 39-na lawm

Arunachal Pradesh Statehood Day vawi 39-na chu nimin khan state pumah lawm a ni. State khawpui Itangar-ah chuan Indira Gandhi Park-ah a lawmna hun hi hmangin, Governor Lt. Gen. K.T. Parnaik (Retd.) in hnam puanzar a pawtpharh a, chibai bukna a lo chhang bawk. He hunah hian union minister Kiren Rijiju, chief minister Pema Khandu, minister leh MLA-te bakah sorkar mi pawimawh eng emaw zat an tel.

Itangar-ah Statehood Day lawmnaah hian cultural showcase hmuhnawm tak neih niin Arunachal-a hnam hrang hrangte nunphung tarlan a ni. Aka, Nocte, Mih Mol, Wangcho, leh Tapu lam bakah Nyishi sipaiten Buyu lam an entir chu mipuite an hlut hle. He lawmnaah hian tribal pawl hrang hrang aṭanga dance troupe-te'n grand cultural performance an nei a, hemi hnu hian Indian Army band-te'n thil hmuhnawm tak an entir bawk.

Governor chuan state tana beitute zahna hlanin, 'Viskhit Arunachal' dinna turin heng an pasalṭhate huaisenna leh inpekna te hi entawn turin mipuite a chah

Union Minister Kiren Rijiju pawhin thu sawiin, infrastructure lama hmasawnna a sawi uar hle a, chung zingah chuan kawngpui, rel leh air connectivity tihchangtlun telin, hei hi “Bharat hmel danglam” entirna a nih thu a sawi. India ramin Viksit Bharat 2047 a nih theihna tura a zinkawngah sipaite hnungzuia thawkrim turin ṭhalaite a ngen.

North-East Frontier Agency (NEFA) tia hriat ṭhin Arunachal Pradesh hian January 20, 1972 khan Union Territory-ah puan a ni, February 20, 1987 khan state puitlingah hlankai niin India-a state 24-na a ni.