Tripura: Leihnuai tui lakchhuah theihna pung

Tripura chief minister Manik Saha chuan Thawhlehni khan Tripura-a kum tin leihnuai aṭanga tui lakchhuah chu kum 2023-a cubic metre tld 1.063 aṭangin kum 2024-a cubic meter tld 1.18-ah a pung tih a sawi.

Udaipur, Rajasthan-a All India State Water Ministers Conference vawi 2-na neihnaa thu a sawiah CM Saha chuan he thu hi a sawi a ni.

Tripura hian eizawnna atan agriculture a rinchhan nasa hle a, state sorkar chuan agriculture lama tharchhuah tih pun leh loneitute sum lakluh tih pun nan irrigation project a dah pawimawh hle tih CM chuan a sawi. Tunah hian Tripura ram zau zawng aṭanga 25% ah thlai chin theih a ni a, heng zinga 47% chuan irrigation chu an chhawr ṭangkai tih a sawi. Sorkar chuan kum lo awm turah irrigation coverage 80% thlenga tihpun a tum a ni, tiin CM Saha chuan a sawi bawk.

State-a lui luang tam tak leh tui khawlkhawm theihna tlem avangin irrigation project lian tak tak chu thawh theih a nih loh thu te, chu ai chuan sorkar chuan ruahtui khawlna tur leh tui pekna tur tuikhuah tenaute tih changtlun a tum zawk thu CM chuan a tarlang.

Saha chuan, "Hectare 30,000-a zaua irrigation project tenau siamna tur hmun 98-ah thlan a ni tawh a, chung zinga 14-ah chuan hna thawh ṭan a ni tawh," a ti. Jal Shakti Abhiyan- Catch The Rain hmalakna an kalpui ṭan aṭangin kum tin leihnuai aṭanga tui lakchhuah chu kum 2023-a cubic meter tluklehdingawn 1.063 aṭangin kum 2024-ah cubic meter tluklehdingawn 1.18-ah a pung thu a sawi bawk.

Tripura sorkar chuan tui humhalhna kawngah hmalakna hrang hrang a kalpui bawk a, chung zingah chuan ruahtui khawlkhawm, tuikhuah siam ṭhat, tuikhuah tih hmasawn leh ramngaw lian tham tak humhalh te a tel a ni.