Meghalaya: Pre-budget meet neih a ni

Meghalaya sorkar chuan a ṭum khatna atan Nilaini khan financial year 2025-26 budget chungchangah pre-budget consultation meeting a buatsaih.

Chief minister Conrad K Sangma chuan consultation meet hi kaihruaiin, state budget siam tur chungchang a hrilhfiah a, meeting hi offline leh online hmangin an nei a ni. Meeting-ah hian sector hrang hrang - zirna, agriculture, academia, economist, civil society aiawh bakah media te an tel thu state finance (economic affairs) department chuan a tarlang

Chief Minister chuan presentation a pe a, inrawnkhawmna an neihin a tum ber chu Meghalaya mipuite duhthusam budget an duan theihna tur a ni tiin, stakeholder zawng zawng hnen aṭanga rawtna lak a nih thu a sawi. Darkar thum chhung awh session neih chhung hian CM Sangma chuan sector hrang hrang aṭanga telte rawtna leh zawhnate a chhang a, online-a thlir tute zawhna pawh a chhang bawk.

Sorkar chu state chhunga sum leh pai lama hmasawnna a awm theih nan leh mipuite tan eizawnna siamsak turin a inpeih thu sawiin, CM chuan sorkar enkawl OTT platform, Hello Meghalaya chuan content siamtu leh film siamtute tan hun remchang a siamsak a, an hnathawh man dik taka pek an nih theih nan a pui a ni, a ti bawk.

Sangma chuan kum tam tak chhunga Meghalaya-in sports infrastructure tana sum a thawh chhunzawm zel avangin kum 2027-a National Games buatsaih tura thlan a nih thu a sawi. A thusawi khar nan hian sector zawng zawngah hmasawnna pumhlum neih a ṭul thu a sawi a ni.