Manipur: Congress-in ngaihdam dil turin PM an phut

Congress party chuan Manipur-a President rule puan chu sorkar laipui leh Manipur-a BJP sorkarte hlawhchhamna a nih thu nimin khan sawiin, prime minister Narendra Modi chu mipuite hnenah ngaihdam dil turin an phut.

Congress president Mallikarjun Kharge chuan a social media X-ah thuchhuah siamin, Manipur-in in hun khirh tak an tawh thu a sawi a, chumi avang chuan President's rule hman a ngaih phah ta a ni, a ti.

Kharge hian a thu post-ah hian prime minister Narendra Modi hming lamin, "Kum 11 chhung zet sorkar laipuiah ro in rel tawh. Manipur-ah kum riat ro in rel tawh bawk. State chhunga dan leh thupek vawnghim tura mawhphurtu chu BJP a ni. National Security leh ramri enkawl chu an sorkar mawhphurhna a ni bawk," tiin BJP sorkarna ngeia President rule puan chuan Manipur mipuite laka PM hlawhchhamzia lantirtu a ni, tiin a sawi.

Congress President chuan sorkar laipuiin President rule chu a duh vang ni loin, state chhungah Constitution zawm loin, BJP kaihhruai NDA MLA zingah tumahin an dik lohna an pawm duh loh vang a ni, a ti bawk. Prime Minister chuan Manipur-ah kalin mipuite hrehawmna leh lungngaihna ngaithla a, ngaihdam dil turin huaisenna a nei em, tiin Kharge chuan a zawt bawk. Congress hotu chuan PM Modi leh a party chu Manipur mipuiten an ngaihdam tawh loh tur thu a sawi a ni.

Hun rei tak tualchhung buaina thlen tawhna, Manipur-ah hian chief minister B Biren Singh-a'n banna a thehluh aṭang ani li hnu, Ningani khan President's Rule hi puan a ni a, state assembly pawh tih tawp lailawk a ni bawk.