Manipur: Sorkarin ramri daidanna siam ngai pawimawh

Manipur chief minister N Biren Singh chuan state sorkarin ramri daidanna siam, state chhunga pemlut thar thliar hrang leh ruihhlo tih rem chu a ngai pawimawhin, hemi atan hian theihtawp a chhuah mek tih a sawi.

Kumbi, Bishnupur district-a mipuite nena inkawmna hun a neihah CM Singh chuan ṭhangthar zelte tana himna leh ralmuanna lo siam chu an mawhphurhna a nih thu a sawi. BJP party chu Manipur leh a chhunga cheng leilung fate venghim theitu awmchhun an ni, a ti bawk.

CM chuan Inner Line Permit (ILP) hman chu state chhung mipuite humhimna tur a nih thu sawiin, hei pawh hi BJP ten prime minister Narendra Modi hnuaia an tih hlawhtlin a nih thu a tarlang.

Tualchhung buaina avanga mahni chenna in chhuahsan ta, mi 2,000 chuangte pawhin an in leh lo ṭheuhah an kir leh theih tawh thu Singh chuan a sawi. Hei bakah hian mahni chenna in chhuahsan mi 500 chuangte pawh eizawnna pek an nih thu a sawi bawk.

State chhunga buaina thlen ṭanna chu ralthuam kengten mipui pawisawi lote an bei a, chenna in te an halsak vang a ni tiin,hei vang hian mi tam tak chuan an in leh lo an tlanchhiatsan a ngai a ni, tiin CM chuan a sawi. Sorkar chuan himna zawnga tlanchhiate, an in lama him taka an kir leh theihna turin hma a la reng a ni, a ti.