Arunachal : Journalist-te sorkar healthcare sheme hnuaiah ziaklut

Arunachal Pradesh sorkar chuan, January 29 khan Arunachal Press Club, Itanagar-a hun a buatsaihah journalist-te chu Chief Minister Arogya Arunachal Yojana (CMAAY) hnuaiah a ziak lut.

Sorkar hmalakna hi February 6, 2024-a thuchhuah a lo siam tawh bawhzuina niin, Arunachal Pradesh Union of Working Journalists (APUWJ) leh Arunachal Press Club (APC) a journalist inziaklutte chuan CMAAY hnuaiah hian hamṭhatna an dawng thei dawn a ni.

Itaganar-a hun an hmanah hian health and family welfare minister Biyuram Wahge chuan thu sawiin, sorkar leh mipui inzawmna ṭha a awm theihnan media an pawimawh thu a sawi.

Wahge chuan sorkar scheme, mipuite tana ṭangkai leh hamṭhatna tur hrang hrang puanzar saktu chu journalist te an nih thu a sawi a, journalist te chu mipuite tan an pawimawh thu leh an mawhphurhna chu report pekchhuah ringawt ni loin, mipui nitin khawsak chawikanna tur atana welfare scheme siamte puang zartu an ni, a ti. Mipui tana thawktu an ni a, an hriselna leh himna chu sorkarin a dah pawimawh hle tih a sawi bawk.

APC president Dodum Yangfo chuan CMAAY hnuaia journalist-te ziah luh an ni ta chu lawmawm a tih thu a sawi a, he hmalakna hian health security mumal nei loa dinhmun khirh tak taka hnathawk ṭhin te a pui dawn a ni, a ti. APUWJ president Amar Sangno chuan he hmalakna hi mellung pawimawh leh chhinchhiahtlak a nih thu a sawi bawk a ni.