Meghalaya : CM-in Umpdem school lungphum phum

Meghalaya chief minister Conrad K Sangma chuan Eastern West Khasi Hills district-a Umpdem RCLP School building thar sakna tur lungphum a phum.

Chief Minister Sangma hian he khua hi a vawi tlawhna a ni a, Umpdem khaw mipuite nen inhmuhna hun a nei thei chu a lawmthu pawh a sawi.

Building sakna tur lungphum a phumnaah hian CM Sangma chuan thu sawiin, zirna pawimawh zia leh hma hun atana nghawng a neih nasat ziate a sawi a, state hruaitute chu ṭhalaiten zirna lama tuina an neih theih nan fuih thar sauh sauh turin a chah.

CM chuan District Headquarters chauh ni loin thingtlang khua zawng zawngah hmasawnna, service leh puihbawmna an mamawh apianga pek chu a tih tur a nih thu a sawi.

School buiding sakna atana Batskhem Ryntathiang, Mairang MDC in a scheme hnuaia Rs nuai 40 a thawh avangin a lawmthu a hrilh bawk.

Sangma hian Block Office, Mawhati C&RD Block, Ri Bhoi district-ah pawh a hawng bawk a ni. He block thar hi Mawhati mipuiten hun rei tak an lo nghah tawh a ni a, Umsning Block tih hmasawnna tura buatsaih a ni bawk.Umsning Block-a sorkar kaihhnawih service emaw scheme emaw ngaihvena kal tur hian mipuite chu km 100 an kal a ngaih ṭhin thu a sawi.

CM Sangma chuan Meghalaya-a Block office-te chu Assam nen an awm ho laia mi an ni tawh hlawm a, tunah chuan thuam ṭhat vek a nih tawh thu a sawi bawk. "Helai hmun hi nakinah chuan eizawnna hmun atana duhthusam a la ni dawn a, Umsning-Mawhati, Assam-a Jagi kawng pawhna sak chu a la pawimawh dawn chauh a ni," tiin mipui chu sorkar nen inlungrual taka thawk ho turin a sawm a, a bik takin ramri hmasawnnan a ṭangkai zual a ni a, a ti bawk.