Assam : Dibrugarh-ah flyover pali siam dawn

Assam chief minister Himanta Biswa Sarma chuan Pathianni khan Dibrugarh-ah flyover pali siamna tur lungphum a phum.

He project-in a tum ber chu traffic tawt tih rehna tur a ni a, flyover siam turte hi Rs vbc 158 senna tur Amolapatty Chariali flyover, Rs vbc 84 senna tur Mancotta Road flyover, Rs vbc 72 senna tur Lohowal-Bordubi-Tinsukia Road flyover leh Rs vbc 62 senna tur Lezai Kalakhowa Road flyover te an ni.

Chief Minister Sarma hi ni thum chamin Dibrugarh-ah a zin a, a cham chhung hian sorkar laipui leh state sorkar scheme, Naharkatia Co-District-a an hnathawh dante a endik nghal bawk. Official-te chu an project thawh mekte a hun taka zo tura a hrilh bakah, thing phun uar pawimawh zia te a sawi bawk.

CM chuan sport infrastructure tih hmasawnna tura ruahmanna siamte a sawipui a, an hmalakna tur zingah hian Naharkatia Hockey Stadium sak leh Naharkatia Nagaon Rajkhowa playground, mini stadium atana thlak danglam te an tel.

Meeting an neihnaa thil pawimawh tak tak an sawi ho zingah Co-District-a tan in sak te pawh a tel. School building sak mek zingah Sasoni Higher Secondary School tepawh a hun taka zawhfel anih theih nan official-te a chah. Sorkar school khar tak te pawh hman ṭangkai leh turin ruahmanna a siam bawk a ni.