Meghalaya : CM-in 6th Meghalaya Games a hawng

Meghalaya chief minister Conrad K Sangma chuan January 21, 2025, Thawhlehni khan Jowai-a Wahiajer Stadium-ah 6th Meghalaya Games a hawng.

State chhunga multi-sport event lian ber, Meghalaya Games-ah hian district 12 aṭangin infiammi 3,500 an kal khawm a, infiamna chi hrang 29-ah inel a ni dawn a ni.

6th Meghalaya Games-ah hian state traditional sport pathum - Mawpoin, Rah Moo Khrah leh An'Ding Oka te telh a ni. A vawikhatna atan para-athlete pasarih - hmeichhe pali leh mipa pathum an tel bawk a, anni hi para-shooting event (pistol leh rifles) ah an in el ang. Games hi ni ruk chhung neih a ni dawn a, medal 1,600 chuang sem chhuah a ni ang.

Games hawngtu, CM Sangma chuan games an buatsaih chu sports ringawt ni loin, sorkarin ṭhalaite laka investment a siam a ni, a ti. State chhunga bial leh district dinte chu tih hmasawnna, state games thleng thei tura hun remchang pek vek an ṭul thu a sawi bawk.

Games theme song hi 'Niom Beit Napthang' niin, official mascot hi 'U Kiang' a ni. He games buatsaihna atan hian Rs vbc 35 vel ruahman nia sawi a ni.

Sports and youth affairs miniter, Shakliar Arjjri pawhin thu sawiin, Meghalaya-in infiamna lama hma a sawn chhoh dan hrang hrangte a sawi lang a, Meghalaya Games neih a nih theihna tura theihtawp chhuahtute chungah lawmthu a sawi. Meghalaya Games chu state chhunga mipuite an state hmun hrang hranga an tlawh theihan hun ṭha a ni bawk tih sawiin, tun ṭuma pawh mi tam tak tan Jaintia Hills an tlawh vawi khatna a ni tur thu a sawi.