Nagaland : Frontier Nagaland chungchanga inbiakna nei

Nagaland-a Frontier Nagaland Territory (FNT) siam phut chungchangah nimin khan Eastern Nagaland Peoples’ Organisation (ENPO), Nagaland sorkar leh sorkar laipui aiawhten inbiakna an nei leh.

FNT hi Nagaland khawchhak lam biala district paruk huama siam phut a ni. Inbiakna hi Chumoukedima district-a police guest house-ah neih a ni a, he inbiaknaah hian sorkar laipuiin palai hna thawk tura ruat, AK Mishra pawh a tel a ni, sorkar laipui aiawh member pathum awmna team a kaihruai a ni. ENPO aiawhin member 13 an tel bawk a, A Chingmak Chang-a'n a ho a ni.

ENPO hian kum 1963-a Nagaland state a din aṭang khan khawchhak lam bialte hi kawng hrang hranga ngaihthah an ni tih an sawi. Kum 2010 aṭang khan district paruk huamah hian state hran siam an lo phut tahw a, an thil phut nawrna atan hian tun hnaia Lok Sabha leh Urban Local Body inthlan neih pawh an boycott a ni. State hran dinna tura an phut huamah hian Kiphire, Longleng, Mon, Noklak, Shamator, leh Tuensang district awmin, heng hmunah hian hnam pariat - Chang, Konyak, Phom, Tikhir, Sangtam, Yimkhiung, Khiamniungan, leh Sema hnam ṭhenkhat an khawsa a ni.