Arunachal Pradesh : Comprehensive free health camp buatsaih a ni

Ni hnih chhung awh free health camp, Mebo MLA Oken Tayeng kaihhruai chu Community Health Centre (CHC), Mebo leh Primary Health Centre (PHC), Borguli-ah Mebo Sub-Division, 39th Mebo Assembly Constituency hnuaiah hlawhtling taka neih a ni. A thlawna inentirna hi January 11 khan neih ṭan niin, January 12 khan Bakin General Hospital (BPGH), Pasighat ah a thlawna mit ṭha lo zaina hun neih a ni bawk.

An hmalakna hi cataract vanga khaw hmuh fiah lo leh mitdelna hial thlen thei laka mipui him nana hmalakna niin, ka chhung leh ha enkawl bakah tualchhung mipuite tan medical check-up an buatsaih bawk a ni. He camp-ah hian damlo inentir mi 604 an awm thu Dr. Komling Perme, District Medical Officer, East Siang District ami chuan a sawi.

He programme hi Siang Eco-Systerm, Environment & Nurture Group (SEEANG) te buatsaih niin Farmers Producers Organization (FPO) Borguli ten an thawhpui bawk a ni. He camp-ah hian mit lama harsatna nei 38 enkawl an ni a, heng zingah hian pterygium, ptosis leh dermoid cyst natna neite chu BPGH Pasighat-ah hlawhtling taka zai an ni. A zaitute hi medical team thiam tak tak zingah Dr. Beauty Borang Perme (Senior Eye Specialist), Dr. Losang Tsetim (Senior Consultant) leh Dr. Ponung Perme (Junior Eye Specialist) te an ni.

Dr. Sum Taboh Tayeng, Vice-President, SEEANG leh a nupui MLA Oken Tayeng ten healthcare hnathawktute tan ni hnih chhung ei leh in an buatsaihsak bawk. SEEANG hruaitute zingah president Milaram Modi leh general secretary Otil Lego te chuan he hun buatsaih leh enkawl hna pawimawh tak an thawk a, damlote hnen aṭangin thlawpna an dawng ṭha hle bawk a ni.

He free health camp-a enkawlna dawngtu kum 78 mi Bangkal Apum chuan MLA Tayeng leh SEEANG te hnathawh chu ropui a tih thu a sawi a, camp chu buatsaih uar sauh sauh turin a ngen nghal bawk.