Manipur : Kamjong district-a camp tihchhiat Assam Rifle-ten chhuahsan

Mipui thinrimin Manipur Kamjong District-a camp an tihchhiat chu Assam Rifle paramilitary force te chuan an chhuahsan tih official-ten an sawi.

Mipui thinrim pungkhawmte hian Hongbei khuaa camp hi luhchilhin an tihchhia.

Tangkhul Naga civil society group te leh Assam Rifle aiawh te bakah Kangjong district superintendent of police leh deputy commissioner ten Pathianni khan meeting an neih thu official-te chuan an sawi a, an dinhmun a ṭhat thu leh buaina a chhuah chhunzawm loh thu official te chuan an sawi bawk a ni.

Assam Rifle-te hian Hongbei-ah hian checkpoint an sak bakah temporary camp an siam a, he lai huamchhung leh ṭhenawm vela chengte chuan paramilitary force-te hian an chet velna an zar buai bakah, thing hralh kawnga an inhlanchhawn ṭhin dan an khapsak niin an sawi.

Kasom Khullen block-a Naga tamna hmuna mite chuan 40 Assam Rifle te awmna camp hi Inrinni khan an luhchilh ta a ni.

Hetih mek lai hian Assam Rifle lam chuan an puhna hi an pha thung a, January 11 khan lirthei thing phur an tihdin hnuah document rintlak an neih loh vanga man an nih thu an sawi ve thung.

Paramilitary force-te chu tualchhung mipuite hian an lirthei man chu chhuah zalen turin an ti a, hemi hnu hian mipui thinrim chuan Assam Rifle camp chhungah hian pawi an khawih ta a ni.

Assam Rifle-te hian tear gas hmangin mipui hnawhdarh an tum bakah van lamah silaite an kap bawk. He buaina chhuakah hian thi leh hliam an awm lo tih report a ni bawk.

Assam Rifle-te hi nikum hmasa, May 2023-a Kuki leh Meitei hnam inkara buaina chhuak venghim turin Manipur hmun hrang hrangah dah an ni.