Assam : Umrangso lungalhthei khur aṭangin ruang pakhat la chhuak

Assam chief minister Himanta Biswa Sarma chuan Nilaini zing khan thuchhuah siamin, Dima Hasao district-a Umrangso lungalhthei khur chhunga la tang zinga ruang pakhat chu para diver ten an lakchhuah thu a sawi.

21 Para Special Force diver-te chuan khur mawnga tang ruang hi la chhuakin, an ruang lak chhuah hi Nepal mi, Ganga Bahadur Sresto a ni tih CM chuan a puang nghal bawk.

Dima Hasao district-a lungalhthei khur hi tuiin a chim a, heivang hian khur chhungah hian hnathawktu mi pakua an tang a ni. Heng mite chhanchhuah hna hi Army, Navy, National Disaster Response Force (NDRF), leh State Disaster Response Force (SDRF) chuan an thawk a, darkar 48 dawn hnuah ruang pakhat hi an la chhuak thei a ni.

Khur awmna hmunah hian SDRF tui pump-na khawl pawh dah a ni tawh a, ONGC tui paih chhuahna tur hmanrua dah an tum bawk. Mahse khua a chhiat avangin Kumbhigram aṭanga MI-17 helicopter hmanga he hmanrua dah an tumna chu an la tikhawtlai rih a ni.

Hnathawkte tan mekna lungalhthei khur hi dan phal loha siam a nih tih hriatchhuah a ni a, case ziah luh niin he thil a inhnamhnawih pakhat Punish Nunisa pawh an man tawh bawk.