Arunachal Pradesh : Itanagar a sana dawr suasam; thawktu 2 ruk bo an ni

Aruanchal Pradesh khawpui, Itanagar-a Akashdeep Market complex-a sana dawr hlun tak leh hriathlawh tak chu Thawhlehni khan suasam a ni a, thawktu pahnihte chu chhun khaw engah ruk bo an ni bawk.

Pawikhawihna hi Thawhlehni tlai dar 4 vela thleng a ni. Mi 10-15 vel hmaituamte chu Genesis Watch Store-ah hian lutin an suasam a, thawktu pahnih chu an hruai chhuak bawk. An mi mante hi All Nyishi Students Union (ANSU) president Lezen Gyadi inah an hreng a, mahse police-te an inrawlh hnuah an chhuah leh a ni.

Superintendent of police Rohid Rajbir Singh chuan he thil thleng hi a hmaa an lo intihbuai tawhna aṭanga rawn chhuak niin a sawi. Hemi ni chawhma lamah khan Gyadi leh a thurualpui mi pathumte chuan dawr aṭang hian pawisa pe loa sana lak an tum a ni. Dawr neitu Takam Tanio rawn inrawlhin, pawisa pe tur hian a rawn ti a ni. Hemi hnu, tlai lamah a dawr hi suasam a ni zui ta a ni.

Dawr suasam a nih hnuah hian police-te chuan pawikhawihtute lakah hian thubuai hrang hrang an ziak lut. An hmel hriat theihna turin CCTV footage pawh enfiah a ni bawk.

Itanagar Market Welfare Association chuan tun hnaia Gyadi kaihhruaite hian vauna an siam hnuah pawikhawihna a thlen fo thu an sawi. Market complex-a chhun khaw en laia pawikhawihna thleng hian mipuite pawh a ti ralṭi in sawiselna a tam hle a, thuneitute chuan hetiang thil a thlen nawn tawh lohna turin venhimna lam pawh ti chak a, rang taka an bawhzui nghal zel tur thu an sawi.