Assam: CM in Tata Trusts Chairman leh industrialist dang hmu
Assam chief minister Himanta Biswa Sarma chuan Mumbai tour a neihnaah Tata Trusts chairman Noel Tata leh a fapa Neville tata te a hmu a, Assam-a Trusts investment an pek vangin lawmthu a hrilh. Advantage Assam 2.0 Summit ah tel turin a sawm nghal bawk a ni.
Chief Minister hian Mahindra Group chairman Anand Mahindra pawh a hmu nghal a, Assam sorkarin industry lama tih hmasawnna an kalpui meka thawhpui turin a sawm. Anand Mahindra nen hian Gateway Building, Steven Street, Mumbaiah meeting an nei a ni. CM Sarma chuan Anand Mahindra chu a taimakna leh finna te fakin, a kaihhruai state sorkar chuan Mahindra Group nena thawhdun a duh thu te a hrilh a ni. Mahindra Group Chairman chu Advantage Assam 2.0 Investment leh Infrastructure Summit, February 25 leh 26, 2025 a Guwahati-a neih turah a sawm ve nghal bawk.
Assam Chief Minister hian L&T CEO S.N. Subramanyam pawh hmuin Investment and Infrastructure Summit ah a sawm bawk a ni. Sarma chuan state chhunga infra project thawh mek te sawilangin L&T leh Assam sorkar thawhdun a pawimawh thute a sawi.
Welspun Group BK Goenka Chairman nen pawh meeting neiin industry leh textile sector-a thawhdunna theihna tur te an sawi dun bawk.
Tun hnai lawk khan CM Sarma hian HDFC bank CEO Sashidhar Jagdishan chu meeting a lo neihpui tawh bawk a, state sorkar leh HDFC te sector hrang hrang a an thawhdun theihna tur te a sawipui a ni. Hindustan Unilever a Rohit Jawa, Dev Bajpal leh Yogesh Mishra te pawh a hmu a, anni nen hian Assam tea industry hmasawnna tur an sawiho a ni.
Luxmi Tea MD Rudra Chatterjee pawh CM Sarma hian a hmu bawk a, Investment and Infrastructure Summit hmanpui turin a sawm bawk. Adani online Director Jeet Adani pawh hmuin Assam infrastructure, power leh defence sector lam ngaihvenpui turin a sawm bawk a ni.
Industrialist hrang hrangte a hmuh hnuah, nimin tlai khan Sarma hian Mumbai-a roadshow neihah telin, he hun hi Advantage Assam summit an neih tura investor-te hip luh an nih theihna remchangah a hmang nghal a ni.