Myanmar mi 26 an ramah thawn let an ni : Manipur CM

Manipur chief minister N Biren Singh chuan Pathianni khan Myanmar mi 26, state ramri kana India rama dan loa rawn lutte chu an ramah thawn kir leh an nih thu a sawi.

Chief Minister Singh chuan a kaihhruai sorkar chuan dan phal loha an state-a pem lutte chungah hremna a pek zel tur thu a sawi bawk. A official social media X-ah Myanmar mi 26 thawn kir an nih chungchang hi Singh hian a sawi lang a, dan loa pem lutte chungah action lak zel a nih dawn rualin, dan ang taka pem lutte chu Manipur-ah an awm chhunzawm phalsak an ni zel dawn a ni, a ti.

Official-te chuan Myanmar mi an thawn lette hi state police leh central force aiawhten border town, Moreh-ah Myanmar thuneitute kutah an hlan thu an sawi.

Manipur sorkar hian dan loa ramri kana pem lutte ven leh dan tumin hma a la reng a ni. Kum 2023, March thla aṭang khan dan loa lut, Myanmar mi 141 chu thawn let an ni tawh a, an zingah hian hmeichhia leh naupang pawh eng emaw zat an tel. He hmalakna hi Ministry of External Affairs (MEA) leh central security force te nena thawk hoin an tih a ni. Hemi rual hian Myanmar tualchhung indona avanga tlanchhiaa Manipur-a lutte chu an theih angin chhawmdawlna pein an theih ang an lo enkawl a, an rama an kir leh theih dan tur pawh ngaihtuahpui an ni tih an sawi bawk.