Duhthua ILP system an kenkawh remti lo

Meghalaya chief minister Conrad K Sangma chuan an state-a Inner Line Permit (ILP) system hman phutin sorkar laipui nawr mek a nih thu a sawi a, phalsak an nih hma chuan state chhunga eng pawl mahin ILP hi an duhthua an lo kenkawh ve ngawt an remti dawn lo tih a sawi. 

Nikum December thla khan state assembly chuan ILP system hman chungchanga sorkar laipui nawrna tur resolution hi pass tawh mah se, tun thlengin central-a BJP kaihhruai sorkar chuan a la ngaihtuah sak lo a ni.

Hetih lai hian state chhunga pawl hrang hrang chuan leilung fate humhalhna turin ILP system hi hman thuai phutin sorkar an nawr reng a ni. Khasi Students Union (KSU) chuan sorkar laipuiin an thil phut hi a tikhawtlai zel a nih chuan an pawl chuan he dan hi state chhungah an lekkawh tawh mai a ngai dawn tih an sawi. War Jaintia region-a Synjuk Ki Rangbah Shnong (SRS) chuan KSU hmalakna hi an thlawp tur thu an sawi tawh bawk. 

CM Conrad chuan ILP hman a nih theihna atan state sorkar pawhin theihtawp a chhuah a, pawl hrang hrangte pawh a bepawp reng ti a sawi. "Governor pawhin sorkar laipuiah hemi chungchang hi a thlen dawn tih pawh a lo sawi a ni. Hemi karah eng pawl mahin an duh dan anga thil an lo kalpui hi a rem lo a, sorkar chuan dan leh thupek kenkawh zel a tum a ni," a ti. 

"Pawn lam aṭanga state chhunga rawn lutte pawh uluk taka enfiah reng a ni. Hei vang hian entry leh exit point-te pawh siam a ni," tiin Umpling-a entry point siam pawh peihfel tawh niin, a thawktu turte training pek mek an ni tih chief minister  chuan a sawi bawk.