Sikkim-in high school leh higher school zirlaite Smart TV leh set-top box a sem vek dawn

Sikkim sorkar chuan state chhunga sorkar hnuaia high school leh higher school zirlaite hnena Smart TV set leh set-top box semna tur scheme a siam. 

Class 8 -11 zirlai 34,000 chuang hnenah TV set hi sem a ni dawn a, hetaṭang hian sorkar laipuiin school, college leh university zirlaite puala a siam, channel 34 awmna Swayam Prabha chu an en thei dawn a ni. Hei bakah hian study material dahna pen drive pawh zirlaite hnenah hian sem vek a ni dawn bawk. 

Sikkim chief minister PS Tamang (Golay) leh governor Prasad chuan kar liam ta khan scheme hawnnaah zirlai pathum hnenah TV set hi an pe a ni. Scheme thawh khatnaah zirlai 10,000 te chu TV set hi sem an ni dawn a, kumin chhungin sem kim hman an tum. 

CM Golay chuan he scheme hi digital education chawi larna pakhat atana siam a ni tih sawiin, "Sikkim-ah internet facility in duhthu a sam lo a, hei vang hian zirlaite hian in lama lehkha an zir theihna turin smart TV sem vek hi kan tum a ni," a ti. TV set dawngtute hi sorkarin subscription fee thla khat a tum sak vek bawk ang. 

He scheme atan hian cheng vaibelchhe 107.30 ruahman a ni a, Rs vbc 30 chu sorkarin a pechhuak tawh. Senso zawng zawng hi state sorkarin a tum rih dawn a, mahse sorkar laipui chu tum ṭhen turin an ngen dawn tih additional chief secretary GP Upadhyaya chuan a sawi.