Meghalaya: BJP ten NEIAH trainee te an tlawh

Bharatiya Janata Party (BJP), Meghalaya chuan North Eastern Institute of Ayurveda and Homeopathy (NEIAH) Mawdiangdiang-a postgraduate trainee, November 26 aṭanga chaw ngheia nuarte an tlawh.

Trainee te hian kum kalta aṭang khan stipend pek an nih loh avanga lungawiloh na an lantir a ni. An nawrh huaihawt hi nimin December 2 khan an tih tawp rin a ni bawk.

BJP palaite cabinet minister AL Hek-a'n kaihruaiin, official te nen inbiakna hun neiin nawrh huaihawtte dinhmun pawh an sawi ho a ni. BJP thupuangtu, M Kharkrang chuan official-te hian zirlaite lungawilohna chu ni 8-10 chhunga chinfel sak an tiam niin a sawi. Lungawi lohna lantir mek, PG leh undergraduate zirlaite zinga pakhat chu a hriselna dinhmun a ṭhat loh avangin damdawi-inah dah a ni a, hei vang hian mi dangte pawh an nawrh hi ti tawp turin Kharkrang chuan a ngen. BJP chuan zirlaite harsatna tawh mek chu sorkar laipuia thlensak an intiam bawk a ni.

Trainee-te hian stipend pek chhuah an nih loh chungchangah director, deputy director leh official dangte chuan an ngaihven tawk lo a, an buaina tawh mek pawh ngaihthah an nih thu an sawi.