Assam: Cabinet-in 2025 public holiday ni 36-ah tihpun remti

Assam cabinet chuan kum 2025-ah state sorkar chawlh chu ni 36 a tihpun a remti a, state chhunga cultural leh regional festival chawlh a siam belh.

Education minister Ranoj Pegu chuan kum thar atan sorkarin ni 36 sorkar hnathawkte tan chawlh a siam belh thu sawiin, ni sarih chu restricted holiday-ah puan a ni bawk tih a sawi.

Sorkar holiday atana puan zingah cultural leh regional festival tam tak telin chungte chu Nuaikhai festival, Bir Raghab Moran Divas, Wangala Festival, Matak Raja Swargadeo Sarbananda Singha Divas, Gurudev Kalicharan Brahma piancham, Sati Radhika Utsav leh Rongker Puja te an ni. Restricted holiday ni ṭhin Ali-Aye-Ligang festival pawh state chhunga district 11 ah public holiday a puan a ni bawk.

Cabinet meeting-ah hian Agrilculture Marketing Board a thawkte tan Voluntary Retirement Scheme (VRS) an pawm bawk. Hei bakah hian Hojai district headquarters (Sadar) Sankardeva Nagar chu Srimanta Shankardeva Nagar tiha a hming thlak turin a rel thlu bawk a ni.

Kar hmasa khan chief minister Himanta Biswa Sarma chuan Karimganj district hming chu Shreebhumi tiha thlak a nih thu a lo puang tawh. He thutlukna hi cabinet meeting Janata Bhawan (Assam Secretariat) Guwahati, Assam a neih ah uluk taka an sawiho hnuin an siam ta a ni.

CM chuan an state-ah an state chanchin nena inkaihhnawih leh inzawmna nei lo hmun leh khaw hmingte pawh thlak chhoh an la ni zel dawn tih a sawi.