Meghalaya : Dubai-ah Khasi mandarin thawn

Meghalaya chuan an state-a thei an thar chhuah, Khasi mandarin metric ton khat chu United Arab Emirates (UAE)-a Lulu Mall, Dubai-ah a thawn.

Department of Agriculture and Farmers Welfare chuan Dubai-a Khasi mandarin an thawn hmasak ber hi Ri-Bhoi district-a Jirang Farmer Producer Company (FPC) aṭanga an lak a nih thu a tarlang.

State chhung hmun hrang hrangah Khasi mandarin hi chingin kumin an thar ṭha hle. Kum 2014 khan he thei bikah hian GI tag pawh an nei tawh a, state sorkar chuan ram danga tih lar leh thawn chhuah tumin hma a la mek a ni. Hemi kawngah hian kum 2017-a din, Jirang FPC chu hma la tu pawimawh tak a ni. State sorkar hian an state tharchhuah thei chawi larna tur hian Delhi leh Bangalore-ah Pineapple and Khasi Mandarin festival-te pawh a lo buatsaih tawh a ni.

Kum 2023 khan Khasi mandarin leh lakhuihthei MT 20 chu ram pawn lamah thawn a lo ni tawh bawk. Mahse direct-a thawn hian a senso a tam tham avangin kuminah chuan state sorkarin Guwahati Customs aṭangin Air India Cargo kaltlangin a thawn a ni.