Meghalaya: NEHU-ah chaw ngheia nawrh chhunzawm zel

Meghalaya-a North-Eastern Hill University (NEHU) zirlaiten tiam chin awm loa chaw ngheia nawrh leh lungawi lohna an lantir chu an chhunzawm zel a, nimin November 15 kha ni 11 chhung an nawrhna a ni. Ministry of Education in an buaina chungchang sawi ho tura committee a koh tur thu a puan hnuah pawh nawrh hi an la chhunzawm zel a ni.

North- Eastern Hill University Students Union (NEHUSU) ten he nawrh hi huaihawtin Khasi Students Union (KSU-NEHU Unit) ten an thlawp. Chaw ngheia nuar zinga mi eng emaw zat chu an hriselna pawh a tlahniam ṭan tawh. NEHUSU president Sandy Sohtun pawh Shillong Civil Hospital-ah dah a ni tawh bawk.

NEHUSU general secretary, Toniho S. Kharsati chuan buaina chungchang sawifel tura committee neih tura tih chu an hnawl thu sawiin, zirlaite thil phut ber tih hlawhchhamna tur mai a ni, a ti. An nawrh chhan ber chu Vice Chancellor ban tir a nih thu a sawi a, sorkarin hma a lak hma chu chhunzawm zel an tum thu a sawi.

Zirlaite hian an thil phut chu sawhsawn an tum loh thu an sawi a, chhanna la hmu mai thei lo mah se an thil phut hian ngaihsak a hlawh vat an beisei thu an sawi. Nawrh huaihawt vang hian University pawh November 6 aṭang khan khar alo ni tawh a ni.