Manipur: Professional course tan coaching scheme hawng

Manipur chief minister N. Biren Singh chuan Nilaini, November 6, 2024 khan professional course hrang hranga entrance exam inbuatsaihna atan Coaching Scheme a hawng. He hunah hian Manipur sorkar leh coaching institute pahnih ten memorandum pahnih an ziak bawk.

Chief Minister’s Coaching Scheme for Entrance Examinations to Professional Courses hawnnaah hian Chief Minister chuan sorkarin zirlaite pui thei tur leh, ṭhangthar lo awm zel turte tan scheme leh project hrang hrang a duan thu a sawi a, education sector-ah infrastructure sak te pawh a tel thu a sawi.

Singh chuan state chhunga civil service lama tuimi te, civil service exam an hmachhawn hmaa coaching class scholarship pek an nihna tura an buatsaih thu a sawi. Zirlai, coaching class kal te chuan competitive exam dangah pawh harsatna tawk loa ṭha taka exam an hmachhawn theih a beisei thu a sawi bawk.

Coaching class hi online mode a kalpui a nih tur thu leh, two-way interactive manner anih tur thu CM chuan a tarlang . Department of Education (S) leh Manipur sorkar chuan he scheme hnuaia zirlaite chu an full course fee a tum sak tur thu a sawi. Zirlai taima leh tumruh tak tak, JEE emaw NEET emaw lo paltlang tawhte chu an zir zelna senso pawh an tumsak tur thu a sawi bawk a ni.

Chief Minister hian Prime Minister Internship Scheme- Pilot Project pawh pharhin, he project hnuaiah hian Manipur-a ṭhalai 76-te tan internship tihna tur hi dah a ni. Thla 12 chhung tur niin, thla ruk chhung chu hands-on-experience a nih tur thu leh, thla tin puihna Rs. 5,000 an dawn tur thu a tarlang.

CM Singh chuan Manipur ṭhalaite pui thei tur general knowledge "Know Manipur" pawh tih chhuah vat a nih tur thu a sawi. Director of Education (S) pawhin "Ek Ped Maa Ke Naam" hnuaia coaching class kal zirlai thlanchhuah te tan thingkung phunna hun tur an ruahman thu a sawi a ni.

Singh chuan School 120 chu School Fagathansi Mission hnuaiah dah an nih tawh thu a sawi a, school dang 120 pawh dah lehin, avaiin school 240 an awm dawn tih a sawi bawk. Fagathansi Mission hnuaia college-te tan pawh state sorkar chuan zirna in a mamawh leh zirna changkang zawk an neih theihna tura hma a lak thu sawiin, zirtirtute pawh STAR Education programme hnuaiah training pek an nih thu a tarlang.