Sikkim: Rabongla-ah infrastructure tihchangtlun a ni dawn

Sikkim minister of road & bridges, N.B. Dahal chuan nimin, November 4 khan an state-a khualzinte hmun tlawh nasat, Rabongla-ah infrastructure tihchangtlun leh thuamṭhat a nih tur thu a puang.

Chief minister Prem Singh Tamang Bipasa hmathlir, BiPaSa (Bijuli, Pani, Sadak) zulzuiin he hmalakna thar hi an puang a ni.

Minister Dahal hian a rang lama thawm ṭhat hna thawh tur leh tihhmasawn ngai lai finfiah turin a hmunah hian a tlawh nghal a, Barfung MLA Riksal Dorjee Bhutia leh Assistant Engineer Kinga Chopel Bhutia, Rabongla PWD ten an ṭawiawm.

Damthang leh Rabongla inkar kawng hi mi tam tak zin veivahna hmun a ni a, kawng hi tihmam zual leh khualzin mite bakah tualchhung mite tana him zawka tlan theihna tura siam a ṭul thu minister hian a sawi.

Putali Vir-ah pawh lirthei tlan an pung nasat avangin kawng zauh hna thawh a ni vat dawn bawk. Minister Dahal chuan mipuite hnenah heng project hrang hrang hi thawh thuai a ni dawn tiin work order pawh thla 1 emaw thla 2 emaw hnuah a chhuah a beisei thu a sawi nghal.

State sorkar chuan BiPaSa hmalakna an thlawp avanga heng project hi thawh a ni dawn tih a sawi a, Sikkim-ah khualzin hip zual tur leh, state economy ṭhanlenna turin heng infrastructure tihhmasawn hi an tum thu a tarlang a ni.