Assam: Bhasha Gaurav Saptah an lawm

Assam chuan sorkar laipuiin classical language-a Assamese a dah lawmna, kar khat awh tur "Bhasha Gaurav Saptah" chu Pathianni aṭang khan Guwahati-a Srimanta Shankardev Kalakshetra ah hman ṭan a ni.

Union cabinet chuan October 3, 2024 khan Assamese bakah Marathi, Pali, Prakrit leh Bengali ṭawngte chu classical language-ah pawm a ni. Guwahati-a lawmna inkhawm buatsaihah hian education minister Ranoj Pegu leh agriculture minister Atul Bora tepawh an tel. Minister Bora chuan Assamese ṭawng, kum tam tak lo zirchiang tute leh an ṭawng hausakna hriat kawnga tha thawhtu zawng zawngte chungah lawmthu a sawi.

"Kum 2000 laia upa tawh , Assamese ṭawng hi prime minister Narendra Modi kaihhruai sorkar chuan sorkar hmasain a tih theih loh, classical language ah a dahsak a ni," ati.

Assam chief minister Himanta Biswa Sarma pawhin social media-ah tunkar chhung hian state mipui, ṭawng hrang hrang hmangtu pawlte chuan an ṭawng chawisawnna leh humhimna an hmang dawn a ni, tiin a tarlang. Assam mipuite chuan Assemse classical language status pek a nih chungchangah sorkar laipui chungah bat lian tak an nei tih a sawi bawk.

Panchayat leh rural development minister Ranjit Kumar Dass bakah Bhawanipur MLA Phanidhar Talukdar chuan Bajali district-ah "Bhasha Gaurav Saptah" lawmna ni pah fawmin kawngzawh an huaihawt a, he hunah hian zirlaite leh khawtual mite an tel.

Dass chuan Assamese ṭawng ti nung zel tura ngenin mipuite chu hemi atan hian sapṭawng hmang tlem turin a chah bawk. "Tun laiah sapṭawng kan hman tel nasat vangin kan ṭawng kan pawlh dal tial tial a ni," tiin a theih anga tam Assamese ṭawng hmang turin mipui a ngen.