Meghalaya: Diwali lawmnaah halmawi leh halpuah hal duhlo

Khasi Students Union(KSU) chuan Meghalaya sorkar chu Diwali hun chhungin boruak bawlhhlawh tur venna atan halmawi leh halpuah hal khapna ti chhuak turin an ngen.

Deputy Commissioner RM Kurbah hnena lehkha an thawnah chuan, KSU environment secretary Shiningstar Kharbihkhiew chuan he hunpui chhunga boruak bawlhhlawh thlen thei thil te tih tawp leh khap tura rang taka hma la tura a ngenna a ziak.

Kumtin Diwali lawmnaah hian nasa taka halmawi hal ṭhin a ni a, hei hian boruak ṭha lo tak siamchhuakin thawkna lama harsatna neite tan tawrh hrehawm khawp a nih thu pawh Kharbihkhiew hian a ziak tel bawk.

Zirlai pawl hian hriselna lama derthawng tak tak, kum upa tawh lam leh naupangte an ngaihtuah thu a sawi bakah halmawi hal nasat avanga emergency service ten harsatna an tawh ṭhin thu pawh an sawi a ni.

Diwali pawimawhna hrerengin mipuite chu eco-friendly diyas emaw khawnvar te chhi zawk turin KSU chuan an chah. Tualchhung mipui tam tak pawhin hei hi an thlawp thu leh,hunpui an hman chhunga boruak tih bawlhhlawh loh theih dan tur bera hman an duh thu lehkhathawnah hian an ziak lang bawk.