Assam: Police-ten mitthi ruang polythene-in hnuk

Assam-a Mangaldoi-a accident thlengah pafa in an nunna an chan a, police officer ten an ruang an sawngbawl dan chuan sawizui a hlawh hle. Police-te hian an ruang hi polythene-a an khung hnuin an hnuk a ni.

Assam Director General of Police, GP Singh chuan he thil thleng hi chipchiar zawk a chhui a nih tur thu leh police ten an sawngbawl dan pawh chhuichian anih tur thu X ah sawi. Accident-a boral ta, pafa hi a pa hian a fanu hi Diwali lawm tura university aṭanga a hruai haw niin, Darrang district-a Saktola bulhnai ah tawhsual hi an tawk ta a ni. An lirthei hian stationary truck, kawngsira ding chu an su a, an lirthei aṭang hian tlachhuak ve ve in an insaseng hma hian truck dang rawn tlan chuan a chil zui ta bawk tih a hmuna hmutu ten an sawi. Mitthi tehi Basab Nagar, Mangaldoi a cheng anni.