Tripura: Police kuttuar vangin tlangval pakhat a thi

South Tripura district-a Sabroom-ah tlangval kum 26 mi chu a chenna inah a thi a, police kut tuar thi nia ngaih a ni. He rukru hi police custody-a a awmlai hian an sawisa nasa hle niin officer pakhat chuan a sawi.

Mitthi hi Badal Tripura, Kaladepa-a cheng a ni a, October 13 khan godown-a rubber sheet a ruk avangin tualchhung mipuiten police kutah an dah a ni. Police-te hian Badal Tripura hi an man laiin a rui hle tih an sawi a, October 14 vek khan an chhuah lehnghal a ni. October 16 khan a chenna inah a thi zui a ni. A chhungten complaint thehlutin, police pahnih leh special police officer ten nasa taka an sawisak avangin a nunna in a tuar ta lo niin an sawi.

Complaint thehluh a nih hnuah Manubazar police station-a duty police panga chu hren mek an nih thu Sabroom SDPO, Nityananda Sarkar chuan a sawi. Sarkar chuan doctor ten executive magistrate telpuina in a ruang hi post mortem a nih tur thu a sawi bawk.

Tualchhung mipui thinrim chuan Ningani khan police station bulah hian lungawi lohna an lantir a, nunna hialin a tawrh khawpa nasa a an sawisa chu an dem thu an sawi. Agartala-Sabroom national highway, Manubazar ami pawh an dang bawk a ni.