Nagaland: Dy CM-in Assam ramri bul khua a tlawh

Nagaland deputy chief minister Y. Patton leh senior official-te chuan Assam nena ramri thubuai nei mek, Mokokchung district-a khaw pahnihte chu Nilaini khan an tlawh.

Deputy CM-in a tlawh hi Tuli area-a Kangtsung leh Wameken Yimsen khuate tlawhin, Kangtsung-a Septsuyong Lu hmuna Assam Police Commando Battalion camp an tlawh bawk. Tualchhung mite pawh kawmin, ramria buaina an neihte chinfel dan an ngaihtuahpui a ni.

Patton chuan khaw mite hnenah prime minister Narendra Modi, union home minister Amit Shah leh Assam chief minister Himanta Biswa Sarma hnenah lehkha an thawn thu a sawi a, hemi chungchang sawiho tur hian state cabinet pawh a ṭhu leh thuai dawn a ni, a ti Khaw mite hnenah hian ramchhung mi dik tak ni lote hnenah an ram hralh lo turin a hrilh bawk. Patton hi Advisor for Fisheries and Aquatic Resources A Pangjung Jamir, Home Secretary Vyansan R, Director General of Police Rupin Sharma leh district administration official ten an ṭawiawm.

Assam leh Nagaland inrina hi km 512 a thui a ni a, inter-state border ṭhenkhat ah hian buaina a chhuak fo a ni. Ramri buaina hi Supreme Court-ah kum tam tak tih fel lohin a awm tawh a, state pahnih Chief Minister te pawh vawi eng emaw zat inbe tawhin court-a inrem tumin an lo bei tawh ṭhin a ni.