Manipur-ah Dengue natna darh mek

Manipur-ah chuan tualchhung buaina a thlen mek karah dengue hri lengin a tibuai hle bawk.

Health minister Sapam Ranjan chuan Lamphel, Imphal West-a Pathiannia press conference a neihah, dengue hri vang hian Imphal West District ah mi pakhat a thi tawh tih sawiin, health department chuan he natna hri darh zel tur vengin hma a la mek a, mipuite ṭawiawmna leh ṭanrualna tel lo chuan he natna tih rem hi a har dawn hle tih a sawi.

September thleng hian Manipur-ah dengue vei mi 448 hmuh chhuah an ni tawh a, Imphal West-ah tam berin mi 259 an ni a, Imphal East-ah mi 117 an an awm bawk. Kum 2023 ah khan he hri vei hi mi 2,548 hmuhchhuah an ni a, thi erawh an awm lo. Kumin August thla chhung khan mi 148 hmuh chhuah niin, September 18 thlengin mi 230 ah an pun belh a ni.

Minister Ranjan chuan mipuite hnenah dengue hri darh zel tur veng tura deparment hma lak dante sawiin, a ṭul a nih chuan thawktu pawh lak belh an ni ang, a ti. Dengue hrik pai thosi te hi health official-te chuan tih rem tumin hma an la mek a, dengue vei an hmuh chhuah awmna aṭanga meter 100 huam chhung chu kah zel niin, mipuite pawhin an him tlanna leh invenna turin an in leh a chhehvelah thosi pian theihna tur tui tlingte an awm tir loh a ṭul thu a sawi. Thosi piang tur lo dan chu dengue hri do letna tura pawimawh a ni, a ti.