Vanglaini - Editors Guild-in journalist-te himna ngaihtuah turin Assam Chief Minister Sonowal an ngen

KHAWTHLIR

Hnam dang truck phalsak rih lo

Champhai Import-Export Transport Forum (CEITU), Mizoram Export-Import Union, Importer Exporter Syndicate, MTOA leh MTDA-te November 19, 2020-a ṭhukhawm chuan, Covid-19 hripui laka mipui an him zawk nan hnam dang truck-te'n kumin chhung chuan Champhai aṭangin bungrua phur chhuak ve tawh rih lo se, an ti.

Inhlawhna siamsak

Aizawl North-II MLA Dr Vanlalthlana chuan Covid-19 lockdown avanga a bial chhunga khawsak harsa zawkte tan inhlawhna a siamsak. Covid-19 léng vanga sorkarin inkhàrkhip a kalpui a ngai a, mi tam takin hna thawk thei loin harsatna an tawh avangin, MLA hian a biala chhungkaw 200 chuang tan inhlawhna a siamsak a; thlànmual leh veng chhung hmun ṭhenkhat tihfai a ni.

SRH-ah mi 45 awm

State Referral Hospital-ah nimin khan Covid-19 vei mi pakhat dah luh a ni a, ani nen mi 45 an awm mek a, an zingah kum 60 chung lam mi 16 an tel. SRH-ZMC Bulletin tarlan danin, mi 45 zinga pathum chu ICU-ah enkawl an ni a, mi dang zawng chu Isolation ward-ah an awm a ni.

Journalist thi rál

Chanchinbumi July 14, 2020-a thi Francis Paul (Gerrard-a Pa) chhungte hnenah Mizoram sorkarin a ràlna Rs. 1,00,000 chu nimin khan IPR director Lallianpuii'n Mizoram Journalist Welfare Society kaltlangin a hlàn. Ràlna inhlanna hi IPR Director pisaah neih a ni a, MJA hruaitute an tel. Francis Paul hi Doordarshan Kendra, Aizawla sports magazine buatsaihtu ṭhin a ni a, MJA member a ni.

Complaint tum

ZPM chuan, January 16, 2020-a Tripura leh Mizoram sorkarin Ministry of Home Affairs kaihhruainaa inremna an siam tawh hnu pawha Tripura-a khawsa zui ta Bru-te Mizoram Electoral Roll aṭanga tun thlenga paih an la nih loh avangin Election Commission of India-ah complaint thehluh an tum thu an tarlang. ZPM hian ECI-a zualkona hi Mizoram Chief Electoral Officer kaltlangin November 23, 2020-ah thehluh an tum a ni.

DAWNTISEI

Editors Guild-in journalist-te himna ngaihtuah turin Assam Chief Minister Sonowal an ngen

Editors Guild of India chuan Ningani khan Assam chief minister Sarbananda Sonowal hnenah lehkha thawnin, an state chhunga journalist-ten beih an tawh ṭhin chungchangte sawiin, journalist-te himna chu ngaihtuah sak turin a ngen.

CM hnena lehkha an thawnah, Editors Guild chuan kum 1991 aṭang khan Assam-ah journalist 32 thah an ni tawh tih a sawi a, journalist-te hian mipuite kutthlak leh vaute an tawk fo a ni, an ti.

Sonowal hnenah chuan misualte laka media mite an himna tura hma la turin an ngen a, Kamrup district-a gambling leh land mafia chungchang report-tu, journalist Milan Mahanta rawng taka kut thlak a nih dante pawh sawichhuakin, Assam-a journalist-te chuan harsatna an tawk fo tih an sawi.

Kum 1991 aṭanga mi kut tuara thi, journalist 32 chhungte hnena CM Sonowal-a'n chhawmdawlna a pe chu lawmawm an tih thu a sawi rualin, Editors Guilds chuan heng journalist-te thatna thubuai tam zawk hi chinfel a ni lo a, pawikhawihtu tam tak chu zalen takin an la awm a ni, a ti.

Share this Post

Login to comment

No Comments