Assam Legislative Assembly speaker hlui, Pulakesh Barua leh AGP, BJP leh Congress hruaitu hlui 19-te chuan All Assam Students’ Union (AASU) political party din thar, Assam Jatiya Parishad (AJP) an zawm. 

AJP zawm thar zingah hian AGP MLA Anup Phukan, zirlai pawl hruaitu hlui Bipul DAS leh AGP hruaitu Mahendra Talukder pawh an tel. 

Party zawm tharte lakluhna inkhawm hi Ningani khan Guwahati-a AJP headquarters-ah neih a ni a, party convenor Basanta Deka leh Krishna Gopal Bhattacharya bakah coordinator Adip Phukan-ten an telpui. 

Pulakesh Barua chuan an party thuam chakna turin theihtawp a chhuah dawn tih a sawi a, BJP leh AGP chu state mipuite beiseina leh hmathlir neihte tihpuitlin sak thei lohah puhin na takin a sawisel zui a ni. Assam mipuite ṭhatna turin rorellai BJP chu paihthlak ngei an ngai a ni, a ti. 

Basanta Deka chuan AJP chuan state chhunga assembly constituency tinah commitee a din thuai tur thu a sawi.

Share this Post