ILP hman phutin Meghalaya-ah nawrh huaihawt

Meghalaya-a pressure group hrang hrangte chuan Bengal Eastern Frontier Regulation, 1873 hnuaiah an state tan inner line permit (ILP) system hman phutin Ningani khan nawrh an huaihawt. 

Shillong-a Makli ground-a sit-in protest hi Khasi Students' Union (KSU) in kaihruaiin, dan loa an state-a pawn lam mi lutte enfiah an nih theihna atana ILP system hman an phutna, sorkar laipuiin hun rei tak a tihkhawtlai sak tawh chu an lungawi lo tih an sawi. 

Nawrh huaihawt hi Federation of Khasi Jaintia and Garo People, Hynniewtrep National Youth Front, Ri Bhoi Youth Federation, Garo Students Union, Achik Youth Welfare Organization leh Association for Democracy and Empowerment ten an thlawp a ni. 

Nikum December 19 khan Meghalaya Assembly chuan an state-a ILP system hman a nih ve theihna atana sorkar laipui nawrna tur resolution chu a lo pass tawh a ni. Chief minister Conrad Sangma hoa union home minister Amit Shah an hmuh ṭumin, Amit Shah hian Krismas zawhah an thil phut hi ngaihtuahsak an ni ang tiin a lo tiam a ni. Mahse tun thlengin ngaihtuah zui a ni ta rih a lo a ni. 

KSU president Lambokstawr Marngar chuan ILP an phutna hun rei tak a tihkhawtlai sak tawh avangin sorkar laipui chuan Meghalaya mipuite rilru a ti na hle tih a sawi. "Manipur hnenah pawh ILP hman phalna a pe mai a, enge harsatna awm? Sorkar laipui ang khata min en a, Meghalaya leilung fate nihna venhim leh humhalh sak a duh tak zet a nih chuan ILP hman phalna hi min pe thuai tur a ni," a ti. 

Sorkar laipui chuan nikum December thla khan Manipur chu ILP hman phalna a pe a ni. 

Hmarchhak state zingah ILP system hi Arunachal Pradesh, Nagaland leh Mizoram-ah hman mek a ni bawk. 

Nawrh huaihawtte hian pawn lam aṭanga lutte khuahkhirhna turin entry/exit point siam thuai an phut bawk. State sorkar chuan Garo Hill-ah entry/ exit point 23 leh Khasi and Jaintia Hills-ah 18 siam a lo rawt tawh a, mahse tun thlengin siam an la ni lo. 



Share this Post

Login to comment
No Comments