RTS Khatla Ṭhazual Fakna chart-ah Pensy-i'n pakhatna a luah
Lenglawng hla hmanga hlawhtlinna a chan hnuin Pensy chuan fakna huangah ropuina a rawn chang leh ta. A hla 'Duhthlanna ruamah' hmangin pakhatna a ni.
RTS Khatla Ṭhazual Fakna thar berah Pensy B. Lalthangliani chuan pakhatna a rawn luah leh ta. RTS Khatla Ṭhazual Faknaa Pensy-i hla, 'Duhthlanna ruamah' tih hla kan hmuh hmasak ber chu March 14 kha a ni. Hemi ṭum hian pasarihnaah a rawn lang. Hetih hunlai hian Lengzem huang lamah pakhatna a hauh mek bawk.
March 28 khan hma sawn chuang loin pasarihnaah bawk a awm a, April 11 kha chuan panganaah a kai chho ta thung. April 25-ah kha chuan palina thleng chho tawhin, May thlaa chart tarchhuah hmasa berah pahnihna hial a thleng tawh a ni. Pakhatna a luah mai tawh dawn emaw tih laiin, pathumnaah a tla thla leh zet a, tunah pakhatnaah a rawn thleng ta a ni.
Pensy hla 'Duhthlanna ruamah' tih hla hi tunlaia fakna hla phuahtu lar, Lalnunpuia Hrahsel phuah a ni a, audio hi Foster Records-a thun a ni. Video lam hi Mspace chuan an khawih thung.
Mizo Idol 2015 winner, Rebecca Zorintluangi music video hmasa ber 'Kraws mak tak chu' tih hla chu parukna aṭangin pahnihnaah a rawn zuang chho dawrh a, ani hi pakhatna a luah ngei a rinawm. Idol intihsiak hunlai ai khan zaiah pawh nasa takin hma a sawn a, a music video hi a hmuhnawm viau bawk.
Palina aṭangin Amtea hla 'Ka thlang ber che' tih la chu pathumnaah a kai a, pahnihna aṭangin Mawitei hla 'A thlamuan ang che' tih chu palinaah a tla thla thung. Pakhatna ṭum thum lai ni tawh, One in Christ, chart hmasaa pakhatna la ni thei chu panganaah an chhuk bawk. Top 10 aṭangin Temi Sailo a chhuak a, Hlimhlimi hla thar 'I pan ang u' tih a rawn lang thar.
RTS Khatla Ṭhazual Fakna
1 Pensy- Duhthlanna ruamah
2 Rebecca Zorintluangi - Kraws mak tak chu
3 Amtea - Ka thlang ber che
4 Mawitei - A thlamuan ang che
5 One in Christ - Ni Thar
6 Stacy VL Muanpuii - Khawngaihna Thing Kraws
7 Chris MS Dawngkima - Thinlungin ka fak ang che
8 Baby Malsawmtluangi - Ka hlau lovang
9 Betea - Ka tan I tuar
10 Hlimhlimi - I pan ang u