Vanglaini - Sorkar laipui leh NSCN(R) in inkahhai pawtsei

KHAWTHLIR

PUC-in zirlai thlah

Pachhunga University College (PUC) chuan an college-a master degree (M.A leh M.Sc.) zirlai chhuak hmasa berte thlahna inkhawm nimin khan an college-ah an buatsaih. PUC-ah hian kum 2018 khan post graduate zirna hawn a ni a, bul ṭan nan Mizo, Philosophy leh life sciences-ahte master degree hawn a ni. Kumin aṭangin Geophysics hawn ṭan an tum a; subject an neihahte hian admission hawn mek a ni.

MTC pass vek

Senate of Serampore College (University)-in October 15, 2020-a result a tihchhuahah Missionary Training College (MTC), Aizawla Bachelor of Missiology (B.Miss) final year zirlai mi 15-te an pass vek. First division (A-)-ah pakhat, second division (B+)-ah mi 12 leh second division (B)-ah mi pahnih an pass a ni.

Thisen pe

ṬKP, Kanan Unit, Aizawl chuan nimin khan Aizawl Civil Hospital tan thisen unit 21 an pe a, a petute mipa 20 leh hmeichhia pakhat an ni. Police Security unit pawhin Police Commemoration Day pualin ACH blood bank-ah unit 16 an pe bawk.

Darlawn PHC tlawh

Health secretary H Lalengmawia chuan nimin khan Darlawn PHC (damdawi-in) sak mek a tlawh.

MP-in CEC kâwm

Lok Sabha MP C Lalrosanga chuan nimin khan chief election commisisoner (CEC) Sunil Arora leh election commissioner Sushil Chandra-te an pisaah a kâwm a, Delimitation Commission hmalakna leh Mizorama inthlanpui buatsaih dante a sawipui. Sunil Arora chuan, Mizorama inthlanpui buatsaih dan chu fel leh ṭha a tih thu C Lalrosanga a hrilh.

Lungphum phum

Assembly speaker Lalrinliana Sailo chuan nimin khan a bial Suangpuilawnah damdawi-in (PHC) sak ṭhat hna bul ṭanna tur lungphùm a phúm. Lalrinliana Sailo chuan, PHC chu a theih anga ranga sak a nih tur thu sawiin, "He damdawi-in hi pantu an tam avangin a thawktu ang zawng pawhin tihphuisui dan a ṭul angin ngaihtuah a ni ang," a ti. Suangpuilawn PHC hi dispensary anga ṭan a ni a, kum 2000-ah PHC-ah hlankai a ni.

DAWNTISEI

Sorkar laipui leh NSCN(R) in inkahhai pawtsei

Sorkar laipui leh Naga helpawl, NSCN(R) chaun inkahhai an lo puan tawh chu thla ruk dang pawhsei an remti. An inremna hi Ningani khan Kohima-ah an ziak a ni.

Inkahhai an puan mek hi October 27-a tawp tur a ni a, mahse sorkar laipui leh NSCN-ten inremna kawng zawnga hma an laknain hma a sawn zel theihna atan leh, boruak muanawm a awm theihna atan thla ruk dang pawhsei an remti a ni.

Kohima-a inremna an ziahnaah hian sorkar laipui aiawhte chu Cease Fire Supervisory Board (CFSB)/Ceasefire Monitoring Group (CFMG) chairman Lt Gen (retd) Amarjeet Singh Bedi-a'n a ho a, NSCN(R) aiawhte chu Dr Amento Chishi (supervisor, CFSB) hoin an tel.

Share this Post

Login to comment

No Comments