Chite lui humhalh dan tur sawiho

Save Chite Lui Coordination Committee chu nimin khan chairman Lalduhoma, chief minister hoin CMO conference hall-ah an ṭhukhawm a, Chite lui humhalhnaa hmalak dan tur an ngaihtuah.

Ṭhutkhawmah hian Save Chite Lui Coordination Committee sum dinhmun, hmalakna tur te, Chite lui tui a pun leh theih dan tur te, bawlhhlawh lut nasa lutuk tihtlem dan tur te, lui kuang leh luia nungchate vên dan turte sawiho a ni.

Sawiho hrang hrangte atan project duan an rél a, lo bawhzui turin Environment, Forest & Climate Change department an ruat. Aizawla Chite lui fintu luikawrte venhim leh tihthianghlim dan tur chu UDPA department kutah an dah thung.

Chite lui humhalhna atana hmalaknaah Save Chite Lui Comprehensive Action Plan Phase-I kalpui zawh tawh a ni a, Phase-II kalpui leh mek a ni.

Chite lui humhalh a nih theih nan Assembly House-a pawm tawh angin, The Chite Lui (Prevention and Control of Water Pollution) Act, 2018 siam a ni tawh.