Mipuiin ZPM-ah beisei an nei sang - Tetea Hmar

Minister of state Lalnghinglova Hmar chuan, ZPM sorkar chu Mizoram mipuiin an enchhin mai ni loin, an en chîk a, beiseina an neih san thu leh, ZPM chu an insawi angin an danglam bik tur a nih thu a sawi.

Lalnghinglova Hmar hian nimina ZPM pisaa inkhawmah thu sawiin, Mizoram state a nih hnuah Congress leh MNF party-te'n ro inrêl chhâwkin ram tan thil ṭha tam tak an lo ti tawh tih a sawi a, "Mipui rualawhna leh thil thar beiseina avangin ZPM kan lo lang ve ta a, mipuite'n ZPM sorkarah beiseina an nei sang a, min enchhin mai ni loin min en chîk hle a, kan ke pên tin hi beiseina nen min thlir reng a ni," a ti.

ZPM chu mi tam takin vawi leh khata ram kalphung thlâk hlawk thei 'magician' ang hialah an ngai tih sawiin Lalnghinglova chuan, "Mipui beiseina hi kan hriat reng a ngai a, kan ram tan hma lam pana kan kal zel a ṭul," a ti a; an sorkar hnu lawkah hun rei tak Model Code of Conduct-in sorkar a phuar chungin hna thawhna hun an neih chhunah hna tam tak an thawh tawh thu a sawi.

Lalnghinglova chuan, ruling party apiangin beih an tâwk nasa ṭhin tih sawiin, hrethiam turin party mikte a chah a, "Sawiselna zawng zawng chhàn lêt a ṭul ber lo a, ṭawng hun a awm a, ngawih hun a awm. Puitling takin ruling party kan ni tih hriaa kan awm thiam a ngai. Social media lama inbeihnate pawh enliam chin neih a ngai," a ti.

Lalnghinglova Hmar chuan, "Mahni hamhai nan ringawt politics-a lut a awm thei a, chutiang mite chu ram ṭhanmawhbáwk an ni fo. ZPM erawh chu kan insawi angin kan danglam bik tur a ni a, kan politics luh chhan hi ram hmangaih vang a ni tur a ni," a ti a; ZPM party mite chu party-a an awm chhan mahni inzawt fo turin a chah.