Nagaland sorkar chuan Ningani khan Kohima-ah Naga political issue chungchangah consultative meeting a buatsaih a, pawl leh party hrang hrang aiawhte telin 7-point resolution an pass. 

Chief Minister residential complex-a State Banquet Hall-a Consultative meeting-ah hian pawl leh political party hrang hrang aiawh mi 209 an tel a, darkar 6 chhung zet meeting neiin Naga buaina chinfelna tura rawtna an neih hrang hrang aṭangin resolution an pass a ni. 

Nagaland chief minister Neiphiu Rio chuan consultative meeting buatsaih a nih chhan hi sawiin, inremna siamna tura sorkar laipui thuchahte sawiho a nih thu sawiin, hemi rual hian Naga buaina chinfelna tur chu kawng khat chauh a awm tih a sawi nghal bawk. Sorkar laipuiin Naga mite culture leh history dangdai tak a hriatthiampui avang leh, Naga movement chu political issue-a a pawmsak avanga a lawmthu pawh a sawi. 

Rio chuan Naga hnamte chuan hmasawnna an duh a, an suang­tuahnate tihpuitlin an duh a nih chuan lungrual taka an thawh ho a ngai tih a sawi. British khan divide-and-rule policy hmangin ro a rel a, hei hi India chuan chhawm zuiin, he policy hian Naga society pawh a ṭhendarh a, pawl hrang hrang awmin ngaihdan leh duhdan hrang hrang a awm zui ta a ni, a ti. Hma sawn tur chuan Naga mipuite inpumkhat leh inlungrual a ṭul thu sawiin, hemi hmangin an buaina chu chinfel a ni thei dawn a ni, tiin a sawi. An meeting chu Naga tana thil chhinchhiah tlak tak niin, sorkar laipuiin Naga mite aw a hriatna tur a ni tiin, pawl hrang hrangte pawh an inhriatthiam lohnate dah ṭhain, ṭhangthar zelte pawhin an hriatreng tur thil an hnutchhiah a ngai a ni, a ti. 

Meeting-naa tel tribal hruaitu, pawl leh political party hrang hrang aiawhte chuan a rang thei ang bera Naga buaina chinfel an duh thu an sawi a ni. Kalkhawmte hian point 7-awmna resolution an pass nghal a ni. 

Resolution-a an tarlan zingah hian sorkar laipuiin Naga-te history a hraithiampui leh Naga issue chu political issue-a a pawmsak avanga an lawmna thu te, Naga tana nationalist worker-te inpekna avanga an lawmna thu te, civil society leh kohhran hrang hrangin an thlawpna avanga an lawmna thu te, 'One Solution for One People' atana theihtawp chhuah chhunzawm zel leh a rang thei anga an buaina chinfel an duhna thu te an tarlang tel. 

Share this Post