Vanglaini - AP-ah security meeting nei

KHAWTHLIR

ATC BD result

Senate of Serampore College hnuaia Bachelor of Divinity (BD) final year result nimin khan a chhuak a; hriat theih chinah Aizawl Theological College (ATC) aṭanga zirlai 25 exam zingah mi pali chu first class (A-)-ah an pass a, second class (B+)-ah mi 17 leh B-ah mi pathum an pass bawk. Back paper neih vanga la pass lo pakhat a awm a ni.

ZPM ṭhalai hruaitu

Zoram Peoples' Movement (ZPM) office bearers-te nimina an president Lalliansawta hoa ṭhukhawm chuan ZPM Ṭhalai president atan Malsawmzuala, Mission Veng an ruat nawn. Vice president atan Lalṭanpuia Zote, Bethlehem Vengthlang leh treasurer atan H Vanlalhuma, Mission Veng-te ruat an ni bawk.

Ambulance pe

Lawngtlai West bialtu MLA C Ngunlianchunga chuan a MLA fund hmanga a lei ambulance thar chu nimin khan Mizoram State Cancer Institute, Zemabawk hnenah a hlân. C Ngunlianchunga chuan, damdawi-ina ambulance a pek chu politics-a thangṭhat lak tum vang a nih loh thu leh, cancer natna tuarte harsatna sutkian a duh vang a nih thu a sawi.

Mask puan sem

Aizawl North-II bialtu MLA Dr Vanlalthlana chuan Covid-19 vanga harsatna tâwkte ṭanpui nan nimin khan a biala self help group (SHG)-te hnenah hmai tuamna (mask) siamna puan (non-woven material) leh elastic band a sem a, SHG-te'n mask an ṭhui tawh ṭhahnem tak chu mipuia sem leh turin a leisak nghal.

ICU-ah 4 enkawl

State Referral Hospital-ah Covid-19 vei vangin mi 36 enkawl mek an ni a, an zinga panga chu nimina dah luh an ni. SRH-ZMC Bulletin tarlan danin, hripui vanga SRH-a enkawl mekte chu Mizo vek, mipa 15 leh hmeichhia 21 an ni a, a naupang ber thla 8 mi niin, a upa ber kum 73 a ni. Mi pali chu ICU-ah enkawl an ni a, ngaihtuahawm erawh an ni lo. Mi dang zawng chu ward-ah enkawl an ni.

Loneitute zirtir

Aizawl district-a Agriculture department chuan nimin khan 'Ei leh bara intodelh' tih thupui hmangin Muallungthu community hall-ah awareness campaign an buatsaih a, thil pawimawh hrang hrang loneitute an zirtir. Covid-19 avangin nakkum lamah ṭàm thleng palh thei a nih avangin, nasa lehzuala ṭan lak a ngaih thu

an tarlang.

DAWNTISEI

AP-ah security meeting nei

Arunachal Pradesh governor Brig Dr BD Mishra (retd) leh chief minister Pema Khandu-te kaihhruaiin Nilaini khan Itanagar-ah high-level security meeting neih a ni a, state huam chhunga international border security dinhmunte an sawiho.

Meeting-ah hian General Officer Commanding (GOC), 3 Corps, Dimapur, Lieutenant General Rana Pratap Kalita, Arunachal Pradesh DGP RP Upadhyaya, Commissioner to the Governor Dr Sagar Preet Hooda, Inspector General of Police (Intelligence) HGS Dhaliwal, IGP (Law and Order) Chukhu Apa leh ITBP NE Frontier HQ (Itanagar) Inspector General Sanjeev Raina-te an tel.

Governor chuan mipuite himna leh Arunachal Pradesh ram venhim chu state sorkarin a ngaih pawimawh ber a nih thu sawiin, mipuite thlamuang taka an awm theihna turin armed force leh state police-ten thawhhona ṭha tak an neih a ṭul thu a sawi. Defence leh security officer-te chu an state-a inlakhran duhtute avanga buaina awm ṭhinte do let dan tur ruahmanna siam turin a chah bawk.

CM pawhin a kaihhruai sorkarin a ngaih pawimawh hrang hrangte sawiin, mipuite himna turin theihtawp a chhuah zel dawn a ni, a ti.

Share this Post

Login to comment

No Comments