UK-in Maldive President hlui hnenah refugee status pe

United Kingdom chuan an rama cham mek, Maldives President hlui Mohamed Nasheed chu refugee status a pe.

Maldive rama democracy kal≠phung-a president atana thlan tlin hmasa ber, Mohamed Nasheed hi president aṭanga paihthlak a nih hnu, kum 2012 khan thuneihna a chan laia judge man tira puh a nih avangin thiam loh chantirin jail-ah khung a ni, kum 13 chhung tang tura hrem a ni. Mahse a thubuai ngaihtuah a nih dan hian sawisel a hlawh hle a, sawiseltu zingah hian United Nations Group on Arbitrary Detention pawh a tel.

Kumin January thla khan Maldive President Abdulla Yameen-a kaihhruai sorkar chuan Nasheed hi London-a inenkawl tura kal a dilna chu a phalsak a. London-a a awm hnu hian UK sorkar hnenah inhumhimna a dil a, refugee status pek a ni ta a ni.

Nasheed chuan thuchhuah siamin, "President Yameen chuan eptu pawl hruaitute chu a mantir zel a, amah sawiseltu leh dodaltu lakah hremna a lekkawh nghal zel a ni. Nikum khan Maldive rama chanchinbu mite zalenna te pawh a bo vek tawh a ni. Maldive rama a inlulin dan kan thlirin, kei leh eptu pawl politician dangte chuan ram pawn lama himna zawnga tlanchhiat mai hi a ngai rih niin kan hre ta a ni" a ti.

Spinal injury avangin Nasheed hi London-ah enkawl mek a ni a, UK-ah chuan an rama eptu pawl hruaitu tlanchhia pawh eng emaw zat an awm niin a sawi. Maldive ram buaina chu UN leh internatinational judicial forum-ahte pawh thlen a thum tih a sawi bawk.

Hetihlai hian Maldive foreign ministry chuan Nahseed hian jail-a a tan tur pumpelh nan inenkawl a ngaih thu hi a chhuanlam mai nia an ngaih thu a sawi. UK sorkarin refugee status a pek thu hi sorkar lam chuan a la nemnghet lo a, hei hi a dik ngei a nih chuan UK sorkar chungah an lungawi dawn lo hle tih a sawi.