Vanglaini - AP sorkarin Advisor to Minister atan MLA 22 ruat

KHAWTHLIR

ATC BD result

Senate of Serampore College hnuaia Bachelor of Divinity (BD) final year result nimin khan a chhuak a; hriat theih chinah Aizawl Theological College (ATC) aṭanga zirlai 25 exam zingah mi pali chu first class (A-)-ah an pass a, second class (B+)-ah mi 17 leh B-ah mi pathum an pass bawk. Back paper neih vanga la pass lo pakhat a awm a ni.

ZPM ṭhalai hruaitu

Zoram Peoples' Movement (ZPM) office bearers-te nimina an president Lalliansawta hoa ṭhukhawm chuan ZPM Ṭhalai president atan Malsawmzuala, Mission Veng an ruat nawn. Vice president atan Lalṭanpuia Zote, Bethlehem Vengthlang leh treasurer atan H Vanlalhuma, Mission Veng-te ruat an ni bawk.

Ambulance pe

Lawngtlai West bialtu MLA C Ngunlianchunga chuan a MLA fund hmanga a lei ambulance thar chu nimin khan Mizoram State Cancer Institute, Zemabawk hnenah a hlân. C Ngunlianchunga chuan, damdawi-ina ambulance a pek chu politics-a thangṭhat lak tum vang a nih loh thu leh, cancer natna tuarte harsatna sutkian a duh vang a nih thu a sawi.

Mask puan sem

Aizawl North-II bialtu MLA Dr Vanlalthlana chuan Covid-19 vanga harsatna tâwkte ṭanpui nan nimin khan a biala self help group (SHG)-te hnenah hmai tuamna (mask) siamna puan (non-woven material) leh elastic band a sem a, SHG-te'n mask an ṭhui tawh ṭhahnem tak chu mipuia sem leh turin a leisak nghal.

ICU-ah 4 enkawl

State Referral Hospital-ah Covid-19 vei vangin mi 36 enkawl mek an ni a, an zinga panga chu nimina dah luh an ni. SRH-ZMC Bulletin tarlan danin, hripui vanga SRH-a enkawl mekte chu Mizo vek, mipa 15 leh hmeichhia 21 an ni a, a naupang ber thla 8 mi niin, a upa ber kum 73 a ni. Mi pali chu ICU-ah enkawl an ni a, ngaihtuahawm erawh an ni lo. Mi dang zawng chu ward-ah enkawl an ni.

Loneitute zirtir

Aizawl district-a Agriculture department chuan nimin khan 'Ei leh bara intodelh' tih thupui hmangin Muallungthu community hall-ah awareness campaign an buatsaih a, thil pawimawh hrang hrang loneitute an zirtir. Covid-19 avangin nakkum lamah ṭàm thleng palh thei a nih avangin, nasa lehzuala ṭan lak a ngaih thu

an tarlang.

DAWNTISEI

AP sorkarin Advisor to Minister atan MLA 22 ruat

Arunachal Pradesh sorkar chuan MLA 22-te chu Advisor to Minister atan a ruat thar.

Ministers of Arunachal Pradesh for Public Service, 2020 clause 3 hnuaiah MLA 22-te chanvo hi ruat thar a ni a, minister-te chu an hnathawhna kawngah leh project thawh mekte enfiahna kawngah an pui dawn a ni.

Chief minister Pema Khandu chuan Nilaini khan CM office-a inkhawm buatsaihah advisor atana ruat thar MLA-te appointment order hi a hlan. Khandu chuan, "He chanpual pek thar avang hian sum lamah hlawkna an neih phah dawn lo a, sorkar sum pawh a hek phah dawn lo," a ti.

Khandu chuan MLA-te chanvo pek an nihna chhan chu rorel tura mipui thlan tlinten an mawhphurhna an hriat chian lehzual theihna atan te, state tana hmasawnna a awm theihna tura teamwork ṭha zawk a awm theihna atan leh, project thawh mekte enfiah ṭhat leh rang zawka zawh an nih theihna atante a nih thu a sawi.

Share this Post

Login to comment

No Comments