Assam NRC aṭangin Hming 10,000 chuang paih dawn

Assam National Register of Citizens (NRC) coordinator Hitish Dev Sarma chuan NRC final list-a dan dik loa telhte hming chu paih tura hriattirna a tichhuak a, 'ineligible person' paih tur hi 10,000 an tling nia sawi a ni. 

Coordinator hian  Thawhlehni khan Depu­ty Commissioners leh District Registrar of Citizen Registration (DRCR)-te hnenah hriattrina hi thawn vekin, dan dik loa NRC list-a telhte hming chu paih vek turin a ti a ni. 

Sarma chuan NRC-ah hian DF (declared foreigners)/DV ("D" voters)/PFT (pending in Foreigners Tribunals)  leh an chhungte dah telte an awm tih sawiin, heng mite hming hi Schedule under the Citizenship (Registration of Citizens and Issue of National Identity Cards) Rules, 2003 hnuaia Clause 4 (6) hmanga paih turin a hriattir. Dan hrang hrangte sawifiahin, Sarma chuan NRC final list hi tihchhuah a nih hmain thuneitute chuan list-ah hian an thun belh theih bakah list-a awm, dan dik loa telhte chu an paih thei a ni, a ti. 

Nikum August 31 khan NRC final list hi mipui hmuh tura tlangzarh ni tawh mah se Registrar General of India-in a la tichhuak lo a ni. Hei vang hian final list pawm a nih hmain hming paih tur list hi thehlut vek turin Sarma chuan a hriattir a ni. Final list tihchhuahah hian hming thehlut 3,30,27,661 zinga 3,11,21,004  telh a ni a, mi 19,06,657 erawh hmaih an ni thung. 



Share this Post

Login to comment
No Comments