Tripura Congress-in nawrh huaihawt tum

Tripura-a Congress party chuan September  21 hian an state-a BJP sorkar rorel dan duh lohna lantirin state pumah darkar 12 awh nawrh huaihawt a tum. 

Nawrh huaihawt an tum chung chang an sawinaah, BJP chuan a rorel danah democracy a palzut nasa a, freedom of speech an nei thei tawh lo a, tumahin sorkar sawiselna lam hawiin aw pawh an chhuah thei tawh lo a ni, an ti. 

State Congress president Pijush Subal Biswas chuan chief minister Biplab Kuamr Deb chu a inluling sawt hle tih sawiin,a kaihhruai sorkar sawiseltute a bei let zel a, media mite thlengin a bei let tawh tih a sawi. 

Tun hnaia CM Deb-a'n state chhung Covid-19 hri leng chung changa sorkar hmalak dan an sawisel avanga media mite a vau chu a dem thu sawiin, hei hi sorkar kal dan phung tur a ni lo, a ti. Biswas chuan an state-a Covid-19 vanga thi chhungte chu sorkarin ralna, cheng nuai 10 pe tura an phut thu a sawi bawk. 



Share this Post

Login to comment
No Comments