PAM convenor TR Zeliang Delhi-ah zin dawn

Naga buaina chinfel a nih thuai a, a rang thei anga inremna siamna tur duan a nih thuai theihna tura sorkar laipui hotute be turin, Political Affairs Mission (PAM) TR Zeliang chuan Delhi-a zin a tum. 

Thawhṭanni khan Naga People's Front (NPF) PAM leh Naga organisation hrang hrang hruaitute chu Dimapur-a Police Complex-ah a inkawm a, Naga peace accord ziah fel thuai an duh thute an sawi a ni. Meeting zawh hnua NPF in thuchhuah a siamah, "PAM convenor TR Zeliang chu New Delhi kalin, Naga mipuiten remna leh muanna a awm theihna tura inremna ziahfel thuai an duh thu central lam hruaitute a sawipui dawn a ni," a ti. 

Chief minister hlui, Zeliang chuan sorkar laipui nena inremna siamna turah, an state mipui aiawh hrang hrangte nena ngaihdan an sawiho hi thil ṭul tak a nih thu a sawi.



Share this Post

Login to comment
No Comments