Assam-a district hospital tinah ICU facility dah dawn

Assam health minister Himanta Biswa Sarma chuan Thawhṭanni khan Assam Critical Care Infrastructure project, cheng vaibelchhe 250 senga thawh tur chu tlangzarhin, state chhunga hospital-te tihchangtlun an nih tur thu leh, district-level hospital tinah ICU facility dah tum a nih thu a sawi. 

He project thawhna tur hian Ministry of DoNER chuan cheng vaibelchhe 140 a tum sak dawn a, a bak hi chu state sorkarin a tum ang. 

Minister chuan state chhung district-level hospital 21 te chuan sorkarin thuam ṭhat a tum thu leh, ICU dah vek a tum thu a sawi. Hei bakah hian medical college-ah pawh ICU-ah khum 100 dah belh tum a ni tih a sawi bawk. He hna thawhna atan hian PWD chuan tender a tichhuak tawh a, thla hnih chhunga infrastructure tharte hi peih fel hman tum a ni, a ti. 

ICU siam thar turte hi peih fel a nih hma chuan staff lak tharte chu medical college-a ICU-ah training pek an ni hrih ang, tiin minister chuan a sawi bawk. 

Minister chuan National Health Mission, Assam hnuaia staff nurse lak thar mi 1,000 leh health department hnuaiah ICU technician lak thar mi 215-te hnenah appointment letter a sem nghal a ni. Pathianni khan doctor 34 lak thar an lo ni tawh bawk. Assam health department leh NHM hian Covid-19 hri len hnuah thawktu mi 5,000 vel an lak belh tawh a ni. 



Share this Post

Login to comment
No Comments