Leverkusen an la tlawm lo

Bayer Leverkusen chu a zawnin match 46 chhung an tlawm lo ta - Inrinni zan khan hun tawp dawnah an si phurh sutin VfB Stuttgart nen 2-2 in an inhnehtawk.

Bundesliga champion hian goal hnih an chhuah hmasa. Mikhual tan Chris Fuhrich leh Deniz Undav ten an khung a, anmahni mualah ngei tlawm thei dinhmuna an din hnuin Amine Adli leh Robert Andrich ten an sut leh hram a, an tlawm lohna chu an chhawmnung hram.

Xabi Alonso naute hian Bundesliga match nga khelh hmabak an la neih lai khan league title an la chiang tawh a, kar hmasa khan Borussia Dortmund lakah siphurh sutin an tlawm lohna an vawng nung hram bawk.

Bundesliga inkhel dangah Bayern Munich chuan Harry Kane-a goal hnih hmangin Eintracht Frankfurt 2-1 in an hneh. Kane hian tun season inelna hrang hrangah goal 42 a khung tling ta a, season khat chhunga goal a khung hnem ber ṭum a tawng ta chiah.